Vaiphei chate hi tawmcha himaleu hin, Christian i hung hiu ah kipatin kipumkhat theilo leh semkhawm theilo in hun sawt tak a la ki um zing ah. 2011 census dungjui in Vaiphei zosia hi 45,000 vel bep i hiu. 1910 kum ah missionary te Mizoram apat hung lut in, chanchinpha ei hun hil ua. Khristian lo um talo dinmun i hung hi tau. Himaleh 1997 kum ah buaina chun nasatakin kochuam te hatlo dan leh Lalgam nasemtu det ah inei teu dinmun dengdel dan ei hiatdaw sak ah. Buai hung thawveng nungin Vaiphei pau mang kochuam zosiate kipumkhat theina dingin VNO te tawh kochuam puitu tamtak ten pan ala la tau hi. Ziagual ah malakna chu hung lawting zelin, Mizoram Synod nuai ah um dingin lemsak a hia. Tichun, Mizoram Synod ah nu leh pate lungsiatna leh dawisakna changin, 16th December 2012 ni chun Synod nuai ah Pastoral Area pakhat hi dingin ei hung huailut tau hi.

Synod nuai ah i hung um nung un, kochuamte nasatakin a ki khangto ah, mihing ngaituana'n ila mulawk lo leh i kinepphak khelun ma i sawn u'i. Mani keng ah le ding thei pai ziang ding i hiu ti ei hiat ziakun, Mizoram Synod chun PCI nuai ah Synod piting pakhat hi dingin ei guanggal ta a hi. I Synod thak min dingun "Tang-Phai Presbyterian Synod" hi tel fel leh sukchian ahi ta'i. Kum 2020 ah PCI General Assembly chun Provisional Synod ah ei hun kawi ta dingin le i kinem u'i.

Presbyterian hina diktak hi i he chian ua, i nam a ding leh khawtang a ding tiangin vangphatna leh malsawmna ei tut hi. Pastor leh Upate mawpuakna leh chanvo kihawpdan ah te, kochuam neu leh lian kilungtuak tak ah vaihawm khawm leh nasepkhawm dan te hi hil ngai talo khawpin i hiau ah i zui thei tau hi. Thagau Thiangtho ah halthakna tawh, belamte etkawlna nasep sep pitin zel ding hi i kochuamin a thiltup pipen chu a hi. Gamthak leh chanchinpha puanzakna ah le kuama nung del diaklo in, theitawp i sua zel ua, zia chu kochuamte hatna thuguk a hi ti hemil pua'i tiu.