Latest Issue

To read latest issue in PDF ... Click Here

 

Editorial…                                                                    

  KHRISTA SUAK

Kochuam puitu pakhat chu a pauchap sin leh, “Lalpa kei la suak, vaivut leh meivam mai hi” tiin a pauchap zing sek a. A pauchapna a thusam chu a hindan tawh a kibang kei pua. Suak dinmun chu a hiachian lo ma ma a hi.

Paul chun Gingtute zosia hi Khrista suak i hi chiat u’i a ti (Phil. 1:1). Sappau ah Servant leh Slave ti hi ei pau ah ‘Suak’ tiin mat a hi gel hi. Zia tak ah ‘Suak’ thumal kimang hi slave a hia. Zia umzia chu Greek pau ah “Saltang suak” tina a hi. Gingtute chu Khrista ding ah Saltang suak tina a hi mai hi.

Suak sum law (servant) chun a nawpna mun leh a nawpna kiangah na a sêm a, Saltang suak a hile vang chawksa, a chawtu chu a neitu ahin, thuneina bangma neilo a hi. Zia suak chun dan dungzuiin a pu thu a mat tawp mai ding a hi. Zalenna neilo a hi. Zia suak dinmun chet hi mangcha’n leh ama hun lai ah suak leh sal ah tangte dinmun hiachian pumin Paulin “Khrista Suak” ka hi a ti. Khrista Suak umzia diktak chu:

  1. Suak chu a pu’n a chawn, a neitu leh a thuneitu le a hi ngal hi. Zia hi Paul in a gen tup pen chu a hi. Paul chu Khrista’n Khraws lek ah thisan ah a chaw ta, a neitu le Khrista a hi bawk hi. Tichun, a chawtu leh a neitu Khrista a ding Saltang Suak gualin a sem a hi. Ei uh gintute hi Paul gualin Khrista suak I hi nau em? Suak neipa, Khrista chu ei neitu a hi nam? Suak sum law mai mai gual i hiu em? Kingaitua hitiu.
  2. Suak chu a Pu a ding bep ahia, thil dang in a mat thei pua’i. A mimalin thuneina a nei pua’i. Zia gual chet hi Paul dinmun a hi. Khrista â ding a hingin-thi le a thi a hi.
  3. Suak chu a pu nasep piak ding ah chawk leh nei a hi. A hun zosia ah – a Pu mitmei vengin a khawsa’n a sem hi. Zia gual ma chun Paul in le a hun nei zosia Khrista a ding a hing a hi. Khrista nungzuite’n Khista suak gual ah kingainiamin na i sem ding uh a hi.
  4. Suak chu a Pu â a hi. A pu kiangah a kituklut a ngai zing hi. Paul ngei leh Khrista â a hia. Korinthte kiang a lekhathawtna’n le a gen hi (Kor. 10:3-5).

I hiat chian ding u chu Paul khan Kochuam sungah Hotu a hi kei pua’i. Khrista Suak a hi. Suak kingaitawm tak gualin A sawlpa, Khrista na a sêm zaw a hi. Khrista Suak gual ah pan khelah sepna sang zaw a um thei pua’i. Ei uh Kochuam puitute leh gingtute hin hotu gual ah sêm loin kingaitawmtak leh kipumpiak pumin leh Khrista suak gualin i belamte enkawlin chawm hitiu.

Tu hun ah Kochuamin a pawimaw chu Khrista suak hi a hi. Khrista suak in pang hitiu in a gen gual ah i sep ding uh a hi (Jn. 12:26; Rom 12:1; I Kor.15:58). I sep dan ding uh Paulin kichian takin ei gen hi: Mi kipakna ding mai ah, mitmei veng bep ah sem loin, Khrista Suak gual zawn, lungsung ah kipat Pathian lunglam hawlin sem zawu in” ei ti a hi” (Eph. 6:6).


  1. Vaiphei khua Hausate tawh kimukhawmna

 July 31, 2018 (Sepkitni) khan Manipur Area sungah Pastor chialbikte leh Kochuam sung ah Vaiphei Hausate tawh kimelhiattuana leh kipawlkhawmna hun pawimaw tak nei a hi. Manipur Area thasangin Rev. C. Zorammawia, A/S in thugenna nei a, Hausate sikin Pu Khatkhotong Biate. S. Munnuam Hausa (President, Vaiphei Peoples’ Council) in thugenna a nei bawk hi. Zia Joint Meeting hun sung hin kipawl nêl taka hun a kimang khawm in kipak a um khawp mai hi. Zia kimukhawmna ahin Pastor/Minster 9 leh Khua Hausa 19 a pang thei u’i.

Literature Week

Central Khristian Khanglai Pawlte guanggalna’n Manipur Area huap Literature Week chu Bial tam zawte’n July hapta 3na (3rd week) sungin lawk takin a mang thei u’i.

 

Bial Huap Music Festival

Manipur Area â ding ah a masa pen dingin Manipur Area huap Music Festival chu August 4-5,2018 sungin Bial tam zawten lawk takin mat zaw a hi. Zia hun sung ahin Khristian La Bu apat la teldawk bikte zilkhawmna leh Kochuamte lasak kidemna le nei a hi bawk hi. Kochuamte’n a lawkpi thu dawn a hi. Kipak a um tak zet hi.

Joint Consultation Meeting

August 8, 2017 (Nilaini; 11:00 A.M) ni’n Thangkai-Lungpau Hall, A/S Office mun ah Manipur Area, Manipur Synod leh Zou Synod Puitute’n Joint Seminar on Church Unity nei ding chungchang genkhawmna a nei ua. Manipur Area sensona nuai ah zia gual hin guanggalna siam a hi.

Topic   :   Church Unity

A hun   :  02 October, 2018 (Sepkitni)

A mun   :  Synod Hall, I.B. Road, Churachandpur

Resource Person :  Rev. C. Zorammawia, A/S Manipur Area & Partnership Consultant

Synod Pastor Refresher Course

Mizoram Synod in Pastor Refresher Course Chennai mun ah August 10-19, 2018 sungah a a guanggalna lakah Pastor 10 teldawk lakin Manipur Area Administrative Secretary, Rev. C. Zorammawia le a va pang thei hi.

Leijangphai Pastor Bial Seminar

Leijangphai Pastor Bial huap “Presbyterianism” Seminar chu August 15,2018 ni’n Tuikumuallum Kochuam Biakin ah Rev. K. Neihsial, Area Co-ordinator resource person hina’n lawk takin mat zaw a hi. Bial sung ah Kochuamtin apatin Kochuam Committee, Bial Puitute leh Bial KNP leh KKP puitute apatin mi 55 val a hung pang thei u’i. Read More..